Të martën grumbullohen hendbollistet

Plot 30 hendbolliste do të grumbullohen të martën (nesër) në Prishtinë, në përgatitje për ndeshjet e radhës që e presin Kosovën. Është një grumbullim i përbashkët i përfaqësueses A dhe asaj U-20, që kanë ndeshje të rëndësishme.

Në kuadër të fazës së dytë të kualifikimeve për evropian, përfaqësuesja A e Kosovës i ka dy ndeshje me Bjellorusinë. Kosova e pret Bjellorusinë më 21 mars nga ora 18:00 në Prishtinë, ndërsa me të njëjtën përfaqësuese përballet në Minsk më 25 mars. Kosova është në grupin e shtatë dhe ka humbur dy ndeshjet e para, nga Holanda e Hungaria.

Ndërkohë hendbollistet e U-20 të Kosovës prej 23 deri më 25 mars duhet t’i luajnë tri ndeshjet e grupit të pestë të eliminatoreve për botërorin e këtij viti. Kosova është në grup me Serbinë, Norvegjinë dhe Sllovakinë.

Në listën e bërë publike nga përzgjedhësi i ri Agron Shabani ka lojtare që mund të luajnë si për përfaqësuesen A ashtu edhe për atë U-20. Në listën e Kosovës janë disa emra të rinjë si ai i Albana Arifit që ka karrierë të gjatë dhe të suksesshme te grupmoshat e reja të Suedisë. Veronika Kastrati, që luan në Norvegji, është emër tjetër i ri te Kosova. Janë edhe disa lojtare tjera që janë ftuar për herë të parë.

Grumbullimi i lojtareve bëhet të martën nga ora 12:00 në Hotel AFA në Prishtinë.