Samadrexha e ka fituar derbin e xhiros së gjashtë të Superligës së Kosovës në hendboll në konkurrencë të femrave.
Të shtunën mbrëma në palestrën “Afrim Bunjaku”, Samadrexha e mposhti kampionin në fuqi, Istogun me rezultat 30:20.
Në pjesën e parë vendaset mbajtën vazhdimisht epërsi prej dy e tri golash, kurse pas 30 minutave rezultati ishte 13:12.
Në pjesën e dytë lojtaret e Samadrexhës ishin edhe më bindëse, kurse në fund krijuan epërsi prej dhjetë golash.
Jennifer Abreu Toledo ishte më efikasja te Samadrexha me tetë gola. Shtatë i shënoi Arona Krasniqi, ndërsa Tina Hetemi shtoi gjashtë.
Tek Istogu, pesë gola i realizoi Farida Mabrouk, kurse Olikaka Balotinelle i kishte katër.
Samadrexha e shënoi fitoren e pestë rresht. Ndërkohë Istogu e pësoi humbjen e parë, pas katër fitoreve.
Samadrexha tani është shkëputur e vetme me 10 pikë. Istogu i ka tetë.
Në dy ndeshjet tjera të së shtunës nuk ka pasur befasi.
Shqiponja fitoi në Gjakovë ndaj Terezës së Obiliqit me rezultatin 43:31. Ana Carolini Gonçalves i shënoi dhjetë gola për Shqiponjën. Nëntë i kishte Juleidt Lourençao, ndërsa tetë Alma Nivokazi.
Te Tereza më efikasja ishte Kaltrina Paci me nëntë gola. Shtatë i shënoi Melike Ipçi.
Për Shqiponjën ishte fitorja e katërt. Tereza e pësoi humbjen e dytë.
Ndeshjen e luajtur në Pejë mes Besës dhe Prishtinës e fituan mysafiret me rezultat 47:23.
Celine Sia Tolno i realizoi 11 gola për Prishtinën, kurse dhjetë i shtoi Eduarta Kurteshi.
Edona Radoniqi u dallua te Besa me 11 gola. Nga katër i realizuan Arnesa Polaca e Samanda Konjuhaj.
Prishtina tani ka dy fitore e tri humbje. Ndërkohë Besa e pësoi humbjen e gjashtë.
