Trepça e ka fituar ndeshjen e xhiros së gjashtë të Superligës së Kosovës në hendboll.
Të enjten mbrëma në palestrën “Minatori”, Trepça fitoi ndaj Vushtrrisë me rezultat 38:29.
Ndeshja megjithatë ishte interesante deri në dhjetë minutat e fundit kur vendasit bënë shkëputje të madhe në rezultat. Në fakt “xehetarët” ishin vazhdimisht në epërsi, por vushtrriasit nuk janë dorëzuar.
Sali Maxhera udhëhoqi Trepçën me 11 gola. Nga gjashtë i shënuan Amar Mujka e Eris Beqiri, ndërsa pesë i kishte Ermir Januzi.
Te Vushtrria 11 gola i shënoi Egzon Ademi. Nga pesë i shënuan Arjanit Hyseni e Muhamed Halili.
Për Trepçën është fitorja e dytë.
Vushtrria e pësoi humbjen e pestë.
Të enjten u zhvillua edhe ndeshja mes Llapit e Besa Famgasit.
Skuadra pejane fitoi me rezultat 43:21.
Edonis Hajra i shënoi 10 gola për Besa Famgasin, derisa Blerton Hasani i shënoi tetë gola për llapjanët.
Besa Famgasi e shënoi fitoren e tretë. Llapi e pësoi humbjen e tretë.
Derbi i xhiros mes Kastriotit dhe Rahovecit zhvillohet të shtunën.
